ԼՂ-ից բռնի տեղահանվածներին օտարերկրյա կառույցները և երկրները տրամադրել են 109 մլն դոլարի աջակցություն. փոխվարչապետ
- Armen Sukiasyan
- Apr 10, 2024
- 1 min read
2023 թվականի հոկտեմբերից հետո Լեռնային Ղարաբաղից բռնի տեղահանվածներին հումանիտար oգնության նպատակով դրամական կամ գույքային աջակցություն են ցուցաբերել մեծ թվով օտարերկրյա կառավարություններ: Այդ մասին, այսօր՝ ապրիլի 10-ին, Ազգային ժողովում ՀՀ Կառավարության ծրագրի՝ 2023 թվականի կատարման ընթացքի և արդյունքների մասին զեկույցի քննարկման ժամանակ ասաց ՀՀ փոխվարչապետ Տիգրան Խաչատրյանը:
«Աջակցության զգալի մասը հատկացվել է ԿԽՄԿ-ին, ՄԱԿ-ի Փախստականնեի հարցերով գլխավոր հանձնակատարի գրասենյակին կամ օտարերկրյա պետությունների զարգացման գործակալություններին: Հայտարարված աջակցության ընդհանուր գումարը կազմել է մոտ 109 միլիոն դոլար:
Եվրամիությունը և որոշ օտարերկրյա կառավարություններ ցուցաբերել են ուղիղ բյուջետային աջակցություն 17 միլիոն դոլարի չափով: Եվս 16 միլիոն դոլար հատկացվել է Համաշխարհային բանկին՝ բյուջետային աջակցության վարկերի արտոնյալությունը բարձրացնելու նպատակով:
Հայաստան են ուղարկվել նաև ԼՂ-ի փախստականներին անհրաժեշտ սնունդ, դեղորայք և անհրաժեշտ կենցաղային պարագաներ»,- ասաց փոխվարչապետը:
