ՀԱԿԱԿՈՌՈՒՊՑԻՈՆԻ ՔՆՆԻՉԸ ԳՐՈՒԹՅԱՄԲ ԱՐԳԵԼԵԼ Է ԻՐ ԴԵՄ ԲՈՂՈՔ ՆԵՐԿԱՅԱՑՆԵԼԸ

Գերագույն խորհրդի պատգամավոր, Գերագույն խորհուրդ ակումբի նախագահ, ԱՄՆ եւ ՀՀ քաղաքացի Ռուբեն Թորոսյանը դիմում-բողոք է հղել Հակակոռուպցիոն կոմիտեի նախագահ Սասուն Խարատրյանին, վարչապետի աշխատակազմին եւ ԱԺ պետարավական հարցերի հանձնաժողովին՝ ընդդեմ Հակակոռուպցիոն կոմիտեի քննիչի «ապօրինի և անհարգալից գործողությունների»։

Նախկինում Թորոսյանը բողոք է հղել նշված քննիչի դեմ, ապա երբ իր բողոքը վերադարձրել են նույն քննիչին՝ ում դեմ նա բողոքել է, երկրորդ բողոքն է գրել, շեշտելով, որ խախտվել են «մի շարք իրավական նորմեր»։ Սակայն այս անգամ «տիկին քննիչից» մի զարմանալի «ժողովրդավարական» պատասխան է ստացել․

«Հայտնում եմ, որ Ձեզ հետ 2024 թվականի նոյեմբերի 8-ին թղթակցությունը դադարեցվել է»։

Ռուբեն Թորոսյանը Սասուն Խաչատրյանին ուղղված նամակում, որի պատճեն ուղարկվել է նաեւ «Հրապարակին» նշում է․

«Այսինքն, կարճ ասած, մեծարգո քննիչն արգելել է, որ այլևս իր դեմ բողոք ներկայացնենք Ձեզ, սակայն չի նշել՝

1. մեր ո՞ր գրությանն է պատասխանում /մենք ուղղակի գուշակում ենք, որ վերջինը կլինի/,

2. իրավական ո՞ր նորմի հիմքով է առաջնորդվում,

3. ո՞վ է որոշում ընդունել և ինչու՞ կամ ու՞ր է այդ որոշումն ՝ ի՞նչու չի կցվում,

4. իրավական ո՞ր նորմն է «թղթակցություն» վերջույթ սահմանում,

5. ինչո՞ւ հարգալից ոճով չի դիմում, մասնավորապես, Ձեր դուր կգա եթե դիմենք այսպես․ Սասուն Խաչատրյանին և վերջ»։

Ռուբեն Թորոսյանը կոչ է արել․ «Խնդրում ենք հնարավորինս հարգանքով մոտենալ ՀՀ օրենսդրությանը և նրա ժողովրդավարական ձգտումներին, այդ թվում, Ձեր գլխավորած կառույցի գործունեությանը, որը հայաստանցիս ստեղծել է կոռուպցիայի դեմ պայքարն առավել նպատակասլաց դարձնելու և ժողովրդավարական արժեքներ տարածելու համար։ Եվ հենց այդ կապակցությամբ, խնդրում ենք պարզաբանումներ տալ վերը բերված հարցերին և, իհարկե, միջոցներ ձեռնարկել արմատախիլ անելու նման, մեղմ ասած, անհարգալից ոճը ՀՀ Հակակոռուպցիոն Կոմիտեում»։