Ռուս գիտնականները ստեղծել են պայթուցիկ նյութերը հայտնաբերող ռոբոտ
Ռուսաստանի Ազգային հետազոտական միջուկային համալսարանի (ՄՀԻ) գիտնականները մշակել են կասկածելի առարկաները ուսումնասիրելու և պայթուցիկների հետքեր հայտնաբերելու համար նախատեսված շարժական հեռակառավարվող «Polkan » ռոբոտի նախատիպ։ Այս մասին հայտնել է Գազետա.ռու կայքը։
Ռոբոտը հեռակառավարվող է, հագեցած մանիպուլյատորով և վերլուծական մոդուլով։ «Polkan»-ը մոտեցնում են կասկածելի առարկային, որից հետո սարքը մանիպուլյատորի միջոցով նմուշ է վերցնում դրա մակերեսից և ուղարկում այն ուսումնասիրության։
Նշվում է, որ ռոբոտի վերլուծական բլոկում օգտագործվում է «Yuzhpolymetal-Holding» ընկերությունների խմբի կողմից մշակված Segment սարքը։ Այն վերլուծում է նմուշները իոնային շարժունակության սպեկտրոմետրիայի միջոցով, որը թույլ է տալիս նույնականացնել և ճանաչել նմուշում պարունակվող նյութերը։ Իոնային շարժունակության սպեկտրոմետրը կարող է հայտնաբերել կասկածելի առարկայի մոտ գտնվող օդում ցնդող նյութեր, սակայն դրա հնարավորությունները սահմանափակ են մակերեսին մնացած պայթուցիկ միացությունների հայտնաբերման ժամանակ։ Նման իրավիճակներում ռոբոտը հնարավորություն է տալիս հեռակա վերցնել նմուշ և վերլուծել այն՝ առանց պայթուցիկը վնասելու։
Մամուլի ծառայության տվյալներով, «Polkan» անվանումը ընտրվել է սարքի գործառույթների ենթադրյալ նմանության պատճառով ծառայողական շան աշխատանքի հետ։ Առաջին նախատիպը՝ «Polkan-0»-ը, դեռևս նախատեսված է համակարգի հիմնական հնարավորություններն ու սկզբունքները ցուցադրելու համար։
Մշակողները նախատեսում են «Polkan-1»-ի նախաարտադրական մոդելի ստեղծումն ավարտել մինչև 2026 թվականի վերջը։ Այնուհետև կանցկացվեն ռոբոտի փորձարկումները, ինչպես նաև սերիական արտադրության նախապատրաստման և հետագա շահագործման փուլերը։ Օգոստոսի 2-ին փորձագետ Օլեգ Զարեմբան հայտարարել է , որ Courier ռոբոտը ստացել է լազեր հեռակառավարվող ականազերծման համար։ Այն այրում է ականի, նռնակի կամ արկի կորպուսը, ինչպես նաև պայթուցիկ նյութը՝ առանց պայթեցնելու։ Այս մեթոդը թույլ է տալիս չեզոքացնել վտանգավոր առարկաները՝ առանց պայթեցնելու, մինչև մի քանի հարյուր մետր հեռավորության վրա, ինչը զգալիորեն մեծացնում է անվտանգությունը և նվազագույնի է հասցնում ոչնչացման ռիսկերը։
