Մեզ համար նույնիսկ մեկ ժամն էական է, որ Սամվել Կարապետյանի խափանման միջոցը փոխվի. փաստացի երկու օրից զրկվել ենք արդեն. Արամ Վարդևանյան
Մեզ համար էական նշանակություն ունի նույնիսկ մեկ ժամը, որ Սամվել Կարապետյանի խափանման միջոցը փոխվի, որովհետև այդ մեկ ժամը կարող է ծառայել քաղաքական գործընթացներին պատշաճ մասնակցության համար: Այս մասին Հակակոռուպցիոն դատարանի բակում, ճեպազրույցի ժամանակ ասել է «Ուժեղ Հայաստան» կուսակցության անդամ, փաստաբան Արամ Վարդևանյանը:
«Մենք փաստացի երկու օրից զրկվել ենք արդեն, որի համաչափությունը, ողջամտությունը, անհրաժեշտությունը չեմ կարողանում ընդունել»,-նշել է նա:
Նա նշել է, որ իրավական գործընթաց չեն տեսնում, այլ քաղաքական հետապնդում, որովհետև իրավական տրամաբանություն չկա:
«Ամփոփելով՝ ուզում եմ նշել՝ մենք խոսում ենք 10 ամիս տևող կալանքի մասին, մենք խոսում ենք ՀՀ-ի նախընտրական շրջանում գտնվելու մասին: Մենք խոսում ենք նրա մասին, որ երեկ անձանց ձերբակալում էին բարեգործության արգելքի ենթադրաբար խախտման հիման վրա, իբրև, քանի որ մենք գտնվում ենք նախընտրական շրջանում:
Հիմա, այդ պայմաններում ինչպե՞ս կարելի է դատական նիստի շրջանակում, առաջնահերթության կարգով սկսել քննարկել խափանման միջոցի հարցը, բայց 2 օրով հետաձգել, երբ մենք ուղիղ, պատճառաբանված դիրքորոշում ունենք, որ նույնիսկ 1 ժամն էական նշանակություն ունի»,-մանրամասնել է Վարդևանյանը:
