ԻՐԱՆՆ ՈՒ ԹՈՒՐՔԻԱՆ ՊԱՏԵՐԱԶՄ ՉԵՆ ՑԱՆԿԱՆՈՒՄ, ԲԱՅՑ...

Իրանը «խաղաղության կողմնակից է, բայց պատրաստ է ցանկացած սցենարի», - ասել է Իրանի արտգործնախարար Աբբաս Արաղչին Ստամբուլում իր թուրք գործընկեր Հաքան Ֆիդանի հետ համատեղ մամուլի ասուլիսում։

«Իսրայելը չի ​​ճանաչում իր կատարած ռազմական հանցագործությունների նկատմամբ որևէ սահմանափակում։ Մենք հանդես ենք գալիս Գազայում և Լիբանանում մշտական ​​և անհապաղ հրադադարի օգտին»,- ասել է իրանցի նախարարը, որի խոսքերը մեջբերում են այդ երկրի ԶԼՄ-ները:

Իր հերթին, Ֆիդանը հայտարարել է, որ Թուրքիան տարածաշրջանում պատերազմ չի ցանկանում:

Նա նշել է, որ «պատերազմի՝ ամբողջ տարածաշրջանում տարածվելու վտանգը չի կարելի անտեսել». 

«Մենք չենք ցանկանում պատերազմ մեր տարածաշրջանում։ Գոյություն ունեցող լարվածությունը նվազեցնելու համար անհրաժեշտ է անհապաղ հրադադար հաստատել Գազայում։ Իսրայելը պետք է դադարեցնի հարձակումները Լիբանանի վրա»:

Թուրք նախարարը նաև ասել է, որ Իսրայելի վարչապետ Բենիամին Նեթանյահուն «անընդհատ նոր ճակատներ է բացում տարածաշրջանում և փորձում է Իրանին ներքաշել այս պատերազմի մեջ»՝ ընդգծելով, որ «Թուրքիան և Իրանը հավերժ կլինեն այս տարածաշրջանում»։