«Իրենք միլիոններ ստացան, ամոթա». 7-միլիոնանոց պարգևավճարներն ու թոշակառուի 10,000 դրամը՝ քաղաքացիների աչքերով

Այսօր հասարակության մեջ ամենասուր քննարկվող թեմաներից մեկը պետական պաշտոնյաների բարձր պարգևավճարների և կենսաթոշակառուների սոցիալական վիճակի միջև առկա ակնհայտ անդունդն է։  

Երբ հարց է հնչում, թե արդարացի՞ է արդյոք 7 միլիոն դրամի հասնող պարգևավճարների ֆոնին թոշակը ընդամենը 10,000 դրամով ավելացնելը, մարդկանց արձագանքները լի են դառնությամբ ու հիասթափությամբ։ 

Քաղաքացիներից մեկը, անդրադառնալով պետական խիստ վարչարարությանը, նշում է. «Դա ամոթ բան է գիտեք, այնքան մարդ են տուգանել, քրոջս տուգանել են 110,000 դրամ դեկտեմբերին, որովհետև հաշվիչի վրա գծեր կար, բայց պլոմբը տեղում էր։ Իրանք հունվարին միլիոններ ստացան, ամոթա»։  

Սոցիալական անարդարության զգացումն ուղեկցվում է նաև բարոյական խորը հիասթափությամբ։ Մի կին հարցին պատասխանեց հուզիչ համեմատությամբ. «Բնական չի՞, որ արդար չէ։ Ոնց որ ջահելը մեծանա, սկսի շատ փող աշխատել մորը չնայի, բայց չէ՞ որ այդ մայրը իրեն ամեն ինչից զրկել է հանուն նրա։ Հիմա նույնը պետությունն է, բա որ այս մարդիկ չլինեն, ում պիտի ղեկավարեք»։  

Շատերի համար 10,000 դրամի ավելացումը ոչ թե օգնություն է, այլ նվաստացում կամ նախընտրական քայլ։ Ոմանք նույնիսկ հեգնանքով են մոտենում հարցին. մեկն ասում է, թե իր սիրտն այնքան մեծ է, որ «այդ 10,000-ը իրեն պետք չէ», մյուսն էլ հստակեցնում է, որ «հավելավճար ստացողների համար շատա, մեր համար չէ»։

Թեև մարդիկ գիտակցում են, որ այդ գումարով «յոլա կգնան», բայց միաժամանակ հասկանում են, որ դա իրական խնդիր չի լուծում։ Հիասթափությունն այնքան խորն է, որ քաղաքացիներից մեկը շեշտում է. «Փաշինյանը ինչի համար եկել է՝ շատ լավ անում է, այս ժողովրդին խաբեցին, սկսած Լևոնից»։