Իրինա Շեյքը հանդիպում է իրենից 11 տարով փոքր բասկետբոլիստի հետ
Սուպերմոդել Իրինա Շեյքի ու բասկետբոլիստ Դևին Բուքերի սիրավեպի մասին խոսակցությունները բորբոքվել են այն բանից հետո, երբ անցած հանգստյան օրերին նրանց միասին են նկատել Հեմփթոնսում։
Քննարկումների ալիքը սկսվել է աստղային կյանքը լուսաբանող Deuxmoi հայտնի Telegram-ալիքի հաղորդագրություններից։ Աղբյուրները պնդում են, որ Լոնգ Այլենդի էլիտար հանգստավայրում գտնվելու ողջ ընթացքում 40-ամյա մոդելն ու 29-ամյա բասկետբոլիստը չեն բաժանվել միմյանցից։
Ըստ պարբերականի՝ կիրակի առավոտյան Բուքերին և Շեյքին նկատել են Իսթ Հեմփթոնի Tutto Caffe սրճարանից միասին դուրս գալիս։ Մի քանի ինսայդերներ միաժամանակ հաստատել են, որ զույգը ժամանակ է անցկացրել ծովափնյա շքեղ հանգստավայրում։
Ավելի ուշ նրանց տեսել են նաև Delilah հայտնի ակումբի երեկույթին։ Համացանցում հայտնվել է նաև ոչ բարձր որակի մի տեսանյութ, որտեղ հայտնիներն ինչ-որ բան են ոգևորված քննարկում։
Ականատեսները Deuxmoi-ին հայտնել են, որ թեև զույգը բավականին մտերիմ տեսք է ունեցել, Բուքերը հասցրել է ֆլիրտ անել նաև հաստատության այլ աղջիկների հետ․ ինսայդերների խոսքով, դա ակնհայտորեն դուր չի եկել մոդելին։
Այս անսպասելի միությունն առանձնակի ուշադրություն է գրավում երկու հայտնիների նախկին աղմկահարույց հարաբերությունների ֆոնին։
Հոլիվուդյան դերասան Բրեդլի Քուփերի հետ Իրինա Շեյքի չորսամյա սիրավեպն ավարտվել է 2019 թվականին․ այսօր նրանք միասին մեծացնում են իրենց 9-ամյա դստերը՝ Լեա դե Սենին։ Հետագայում՝ Ժիզել Բյունդխենի հետ աղմկահարույց ամուսնալուծությունից հետո, մոդելին են վերագրում նաև NFL-ի աստղ Թոմ Բրեդիի հետ կարճատև հարաբերությունները։
Դևին Բուքերն իր հերթին շուրջ երկու տարի հարաբերությունների մեջ է եղել Քենդալ Ջենների հետ, որից նա վերջնականապես բաժանվել է 2022 թվականի վերջին։
